Heb 1 | AMNAMANAB | STEP | Autunam God bigelni Ju elni simbianigam mo faigim Godna mo fli sihiafule elni mengig la sihi fwahafena. Afa haig haig was mi afa haig haig mina mi God sihi fwahagim

bSam 2:7

c2 Sml 7:14

dSam 104:4

eSam 45:6,7

fSam 102:25

gSam 110:1

Hebrews 1

Sisas Krais Godna Leg oflanai elim gosenig

1 Autunam God bigelni Ju elni simbianigam mo faigim Godna mo fli sihiafule elni mengig la sihi fwahafena. Afa haig haig was mi afa haig haig mina mi God sihi fwahagim

2 Afa glauwo awaiegim osuna muhla fegim ofeba God heafna Legna bigelim sihinig. Afa ena Luwalna ehe mungwali gawig eseageg fwahagba afa maia sumi yi osuna awaiegim ofehba God ehem ati gisfu fwahag asa ma ehe enaig gawigim lambife.

3 Afa ena Luwalba eba God lofug mungwalofug asa ehe Godna ombusugug ogfufe. Afa heafna wasneig mo mungwali gawigim kike lambku gufufe. Afa ehe maia elim mina gafugagfenibi asa afsug fifi ehe ati heven gam ikag Godna sisi yi nemugna pegag sime muhla la go. ^{▼▼1:3Afa el muhla God nai yi go eba ogfug enag el eba suialag unehlagna feg.}

4 Asa ehe oflanai elim gosenig. Afa unehlag God ehem faigba eba oflanai elni unehlagim gosenig.

5 Afa enag moba Sisasna unehlagim fingi fukug afa God mas oflanai elim enaig esonig mo ehe enaig esog;

Neba kana Leg feg afa hwag osunaba ka ambala sihig ka neana Alag fefe. ^b
Afa ena gafa mas enaig moba oflanai elim esonig mo;

Eba ka ehena Alag fefe afa ehe kana Leg fefe. ^c
6 Afa God goflanai Luwalim onigihiafiba asa ehe enaig esofe og

Sa ma mungwali Godna oflanai el ehena unehlagim fingi fi.
7 Afa oflanai elbi eba God enaig esonig;

Ka kikeafna oflanai elim esenibi sa ma efef lofi afa enag gafugag el sa ma suwi meleg lofi. ^d
8 Afa Luwalimba eba God enaig esog;

Neba God feg asa ne wahkig misog el gofufe afa ne mungwali elim numwehe kwefihiagenam afa nangwagihiagefe.
9 Afa suialag nihe mo ne membeg afa amtakwalig nihe mo ne olug kakagenag. Asa kaba neana God ka neana unehlagim fingi feg afa sa neana sifakaleg kwaniafeg. Afa ne nimbeafna hihem gosenig. ^e

10 Afa God heafna Legim mingnag mo maisim sihinago og;

O Ainiyag, autunam ne hwa bitem esegba afa nimbiafna ningana ne ofum eseg fwahag.
11 Afa enamba eba awaiefe afa nimbiafba ne wahkig gofufe. Afa enamba ofenaiba lofug watiauegim afa piplehiagofe.

12 Afa ne mumwanefku fakafe ofenaiba el lofug huguflakagim afa yimieg fatig. Afa ne gwese gofufe afa ne mas watiauwe. ^f

13 Afa God heafna Legim enaig esonag og;

Sa ne kana muhla pegaiba ka maia neana angoluwagim filafe klaitiba sa ma ehengel nem ahnai skaufini. ^g
Afa sonaig moba God mas oflanai elimba esonig mo.

14 Afa mungwali oflanai el eba sungwabug figim afa Godna gafugag el fig. Afa sa God ningitigiba elim God sa ona lambim enam kwaganig.